السلام عليكم ,, اليوم راح اسولفلكم من ردت اسافر للكلية ,, و
طبعا اسافر مو لان كليتي واقعة بالقطب الشمالي قاطبة (
قاطبة شنو ) و انما لأن الطريق كلش طروق
,, 5 سنين ضوئية يلا اوصل ,, يعني مرة زينت و طلعت وصلت لكلية لحيتي طالعة
مرة لخ ,,



اي والله وداعة روبي
,, المهم ,, كلت اصعد كيا حتى اصرف شوية



ستووووووووووب ( هاي
اني دا اعيط بنص الشارع حتى توكف الكيا ,, العالم فزو عبالهم وكع عليه من
السما حيوان فرس النهر شي )



وكفت الكيا وانتظرت
الباب تنفح ,, واحد كاعد بصف السايق اذانه ماعونين و خشمة بكد المبردة مال
جوارينا الي عطلان الستيرين مالتها كلي اثعد بابا ثنو وين كاعد بثويثرا ؟؟
افتح الباب واثعد



ثويثرا هههههه هاي
بثف باب الثرجي ترة ,,المهم ثعدت ,, ودعدت ليورة و بديت اتفرث على عالم



وحدة لابسة عباية و
شايلة جدر مال حليب وكيمر وبس بقة اتفوت بقرة جوة الكيا ,, ناوشتني جدر
وكلتلي لزمه زين ,, اني مثل ال ...... لزمتة وكلساع وية كل طسة الحليب
بالجدر يوكع عال بنطرون و الكة بنطروني الاسود ديصير ابيض شوية شوية الى ان
ورة ثلث ساعة اتاكدت انه اللي لابسه هذا مو بنطروني وانما بنطرون صاحبي
لان اني ما عندي بنطرون ابيض ,, المهم



اكو واحد هو حباب بس
خبل ربما ,, و انما منغولي بلا ريب .. كل 5 دقايق يسالني عن الوقت



- سعبيش ؟


9- ب


- سعبيش


- ب9 خمسه


- سعبيش؟


ب9 وعشرة


اخر شي كتلة ورة ساعة
راح اتصير 10 و 10 ,, فورة ساعة اسالني سعبيش حتى اكلك عشرة و 10 ماشي ؟؟



- ماشي هاهية



ورة
3 دقايق



- سعبيش ؟؟؟؟؟


الربع ساعة اللي
وراها كضيتها انه اباوع على ساعتي اللي بيد المنغولي صارت حتى لا ايخبلني
كلشوية سعبيش و سعبيش ,,و بنفس الوكت اباوع على بنطروني و ابجي على حظي
اللي سواه ابيض ,, و فوكاها ام الكيمر كعدت اتكرز حب و فستق و تشمرة عليه
,, فستق و حليب صار محلبي مو بنطرون
...



وواحد متقاعد كدامي
يمكن عمره 319 سنه ,, متوفي 5 مرات و يطمح ان يتوفه للمرة السادسة ,, طالع
تقاعد من قبل ما يبنون دائرة التقاعد ,, و من الحواس الخمسة بس تشتغل عندة
حاسة التنفس



والحواس الباقيه لو
واكفه و مكتوب عليها



(game over)


لو عايفها بالبيت لو
ناسيها بغير كيا



يسألني ...


- أبني جلالة الملك
صدك كتلوه ؟؟



اني ظليت حاير يا ملك
يقصد ؟؟



اللي اعرفه انه طلعت
من بيتنا نظام جمهوري ,, الا اذا حوروه ملكي ستيرن يسرة من جنت نايم



حجي يا ملك تقصد ؟؟؟


- ملك فيصل ابني


حجي هذا من زمان مات
,, انتة وين جنت بالحمام؟ يمعود حجي شنو القصة



الحجي طلع من جيبة 8
فلوس وانطاها للسايق



هاك ابني و رجعلي
الباقي



السايق فز ,, عباله
عملة مال المعيــــــــب يك هاي ,, لان الحجي جان لابس شفقة مثل مال
الامريكان بالاربعينات
,,



حجي الكروة 750 دينار-


ابني هاي 750 اشتريت
بيها همر سنة ال 1931
-



- حجي يرحم خشمك سنة
ال 31 وين جان اكو همر؟



- لا ابني اكو بس موديل قديم


( يجوز بدون جروخ )


لحد هنا ما اتحملت و
كمت على حيلي بنص الكيا دا اصيح



downloading


و جررب راسي انصمط
بالسكف مال كيا و اغمى عليه
,,



سمعت ام الكيمر اترش
على وجي حليب و اتصيح شوفولة بصلة بصلة خطية الولد



و اللي كاعد بصف
السايق ابو اذانات 44 يكول هاي ثووو هثة ثجابك عال ثكف ؟؟



اني خجلت حيل و كتلهم
ماكو شي و قررت انزل



امشي بالشارع بياض
مال حليب على وجي و بنطروني امركع ابيض و اسود اتكول طالع جني صباغ



و هكذا وصلت للكلية
,, و الحمدالله محد ما عرفني بهذا الزي التنكري اللي جنت بي ,, و عاشو عيشة
سعيدة